សេចក្តីថ្លែងការណ៍៖ អាជ្ញាធរមីន ថ្កោលទោសចំពោះការឈ្លានពានយ៉ាងធ្ងន់ធ្ងរខុសច្បាប់ដោយយោធាថៃមកលើកម្ពុជា
នៅថ្ងៃទី១៩ ខែធ្នូ ឆ្នាំ២០២៥ អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន (អាជ្ញាធរមីន) បានចេញសេចក្តីថ្លែងការណ៍ថ្កោលទោសយ៉ាងខ្លាំងក្លាបំផុតចំពោះអំពើឈ្លានពានយោធារបស់ថៃមកលើអធិបតេយ្យភាព និងបូរណភាពទឹកដីកម្ពុជា។ អាជ្ញាធរមីនបានបញ្ជាក់ថា ភាគីថៃបានប្រើប្រាស់កម្លាំងទ័ពអាកាសទំនើប រួមមានយន្តហោះចម្បាំង F-16 ដើម្បីទម្លាក់គ្រាប់បែកលើតំបន់លំនៅដ្ឋាន និងទីតាំងស៊ីវិល ដែលបង្កឱ្យមានការបាត់បង់ជីវិតពលរដ្ឋ ការភៀសខ្លួនទ្រង់ទ្រាយធំ និងការបំផ្លិចបំផ្លាញហេដ្ឋារចនាសម្ព័ន្ធ ក៏ដូចជាបេតិកភណ្ឌពិភពលោកផងដែរ។ ជាមួយគ្នានេះ អាជ្ញាធរមីនបានអំពាវនាវយ៉ាងទទូចដល់សហគមន៍អន្តរជាតិ អង្គការសហប្រជាជាតិ និងអាស៊ាន ឱ្យថ្កោលទោស និងចាត់វិធានការភ្លាមៗដើម្បីបញ្ឈប់អំពើឈ្លានពាន និងការពារជនស៊ីវិល។
អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន (អាជ្ញាធរមីន)
